Napalgan ang usa ka gituohang explosive device duol sa sapa sa Jardin De Señorita Resort sa Purok Bugac, Sitio Bacoco, Barangay Kapatagan, Digos City karong Enero 7, 2026.
Sumala sa kapulisan, 12:01 PM nadawat ang pahibalo pinaagi sa hotline gikan sa usa ka kawani sa resort human niya makit-an ang usa ka delikadong butang samtang nagtan-aw sa tinubdan sa tubig sa maong lugar sa 11:00 AM.
Human ipahibalo sa manager sa resort, daling miresponde ang kapulisan sa Kapatagan COMPAC ug ilang gi-cordon ang palibot aron masiguro ang kaluwasan sa publiko samtang naghulat sa mga eksperto sa pagdumala sa eksplosibo.
1:30 PM, miabot ang Provincial Explosive and Canine Unit sa Davao del Sur ug malampusong narekober ang usa ka yunit sa explosive device nga PRB 423 HE. Ang maong device giturn-over sa PECU alang sa hustong pagdumala ug disposisyon.
Padayon ang imbestigasyon sa kapulisan aron matino ang gigikanan sa maong explosive ug malikayan ang posibleng hulga sa komunidad.
