Gibutyag ni Norayah A. Acas, Provincial Director sa Technical Education and Skills Development Authority (TESDA) sa Lanao del Norte, nga ang ahensya usa ka mahinungdanong kabahin sa gobyerno nga nagtumong sa paghatag og konkretong oportunidad ug skills intervention sa mga Pilipino aron mapalambo ang kahimtang sa kinabuhi.
Gipasabot ni PD Acas nga daghan og mga programa ug scholarship nga gitanyag ang TESDA nga mahimong mapahimuslan sa mga katawhan sa probinsya sa Lanao del Norte ug sa dakbayan sa Iligan.
Sumala pa ni Acas, ang tumong sa mga programa sa TESDA mao ang paghatag og tinuod nga oportunidad sa katawhan aron makabaton og National Certificate II kun (NC II), usa ka sertipikasyon nga giila sa nasud ug sa gawas sa nasud, ug mahinungdanon kaayo aron makaangkon ug tsansa sa pagpangempleyo ug panginabuhian.
Gihatagan usab ug gibug-aton ni Provincial Director Acas nga pinaagi sa mga programa sa TESDA, dili lang kahibalo ang ihatag kundili praktikal nga kahanas nga magamit dayon sa trabaho, negosyo, ug pagpanarbaho sa lain-laing sektor.
Nanawagan usab siya sa publiko nga pahimuslan ang mga programa sa TESDA, ilabi na ang mga walay trabaho, out-of-school youth, ug mga nanginahanglan og dugang nga kahanas, aron makab-ot ang mas lig-on nga kaugmaon.
