Mipadayag ang Department of Health o DOH–Zamboanga Sibugay sa positibong resulta sa ilang padayon nga kampanya batok sa ilegal nga droga sa lalawigan.
Sumala sa DOH Sibugay, dako ang natabang sa ilang mga programa sa pagpakunhod sa epekto sa ilegal nga droga sa panglawas sa komunidad. Lakip niini ang pagpalig-on sa drug abuse prevention education, community-based rehabilitation programs, ug mental health services alang sa mga naapektuhan sa droga.
Gipadayag usab sa ahensya nga misaka ang ihap sa mga indibidwal nga boluntaryong misalmot sa rehabilitation programs, usa ka timailhan nga mas daghan na ang nahibalo ug andam nga motabang sa ilang kaugalingon aron makalikay sa bisyo sa droga.
Nagpadayon usab ang DOH sa ilang pakigtambayayong sa lokal nga pangagamhanan, kapulisan, ug mga eskwelahan aron mapalig-on pa ang kampanya batok sa ilegal nga droga, ilabi na sa kabatan-onan.
Nag-awhag ang DOH Sibugay sa publiko nga suportahan ang mga programa sa gobyerno ug magpadayon sa pagpakabana alang sa usa ka himsog ug malinawon nga komunidad nga walay droga.
Photo Courtesy:Provincial DOH office Zamboanga Sibugay
