Walay epekto sa ekonomiya Pilipinas ang kagubot sa politika sa Venezuela, matod ni Economic Development Secretary Arsenio Balisacan, human gidakop sa pwersa sa Estados Unidos si Venezuelan President Nicolas Maduro.
Sumala ni Balisacan, gamay ra ang direkta ug dili direktang kalambigitan sa ekonomiya sa Pilipinas ug Venezuela, busa dili kini makahatag og mahinungdanong implikasyon sa lokal nga ekonomiya. Dugang pa niini, posible lang nga adunay dili direktang epekto kon mosunod ang ubang nasud sa susamang lihok, apan sa kasamtangan, wala’y ikabalaka ang Pilipinas.
Samtang gipahayag sa Department of Foreign Affairs (DFA) ang kabalaka sa kahimtangan sa Venezuela. Giingon sa DFA nga bisan pa sa mga konsiderasyong pangseguridad sa US, kinahanglan gihapon tahuron ang internasyonal nga balaod, lakip ang prinsipyo sa dili pagpanghilabot sa sulod nga kalihokan sa laing nasud.
Gitawag usab sa DFA ang tanang nalambigit nga partido nga likayan ang pagpasamot sa tensiyon alang sa kaayohan sa tanang katawhan, ilabi na sa kapin 80 ka Pilipinong nagpuyo sa Venezuela.
Sa laing bahin, giila ni Caloocan City 2nd District Rep. Edgar Erice ang iyang kabalaka ug gitawag ang lihok sa US nga usa ka invasion, nga matod niya wala’y lugar sa demokratikong kalibutan.
Photo Courtesy: wikiwand
