Nagpatuman ang Bukidnon Provincial Detention and Rehabilitation Center (PDRC) sa ilang unang Operation Greyhound / Oplan Galugad alang sa tuig 2026, nga gihimo sulod mismo sa detention facility ug mikober sa tanang detention cells ug sa tanang Persons Deprived of Liberty (PDLs).
Ang maong operasyon gitumong aron masiguro ang kaluwasan, seguridad, ug hapsay nga pagdumala sa detention center, ingon man sa pagpugong sa pagsulod ug presensya sa mga ilegal ug ginadiling nga butang sulod sa pasilidad. Kabahin usab kini sa padayon nga paningkamot sa PDRC sa hugot nga pagpatuman sa mga lagda ug regulasyon.
Gipadayag ni Provincial Warden Nelson Rocky A. Balaba, RCrim nga kanunay nilang ginahimo ang maong kalihukan. Sumala kaniya, atol sa operasyon, ubay-ubay nga ginadiling nga mga butang ang ilang nakuha sama sa lighter, gunting, tabako, ug uban pang mga butang nga hugot nga gibawal sulod sa pasilida.
Ang kalihukan gipahigayon ubos sa iyang direktang pagdumala uban sa aktibong partisipasyon sa tanang personnel sa Bukidnon PDRC. Gituman ang hustong mga pamaagi sa tibuok operasyon ug nakita ang maayong koordinasyon sa tanang personnel aron masiguro ang malinawon, disiplinado, ug organisadong implementasyon.
Gipahayag sa pamunuan sa PDRC nga magapadayon sila sa pagpanalipod sa seguridad, disiplina, ug rehabilitasyon sulod sa pasilidad, samtang ginatamod ang kaluwasan sa mga personnel ug sa mga Persons Deprived of Liberty.
Ang regular nga inspeksyon ug operasyon sama sa Oplan Galugad kabahin sa ilang padayon nga paningkamot aron mapalig-on ang usa ka luwas ug hapsay nga palibot sa Bukidnon Provincial Detention and Rehabilitation Center
Photo Courtesy:BUKIDNON PDRC
