Sa unang higayon sukad nagsugod ang giyera tali sa Israel ug Hamas, nakit-an ang halapad nga selebrasyon sa Pasko sa Bethlehem, ang dapit diin gituohang natawo si Hesukristo.
Bisan pa man nga tinuig nga gipaabot ang pagsaulog sa Pasko sa syudad, wala kini makit-i sa nangaging mga tuig tungod sa giyera. Unang nadesisyonan sa syudad nga kanselahon una ang mga magarbo nga Christmas festivities sa miaging mga tuig isip pakighiusa ug konsiderasyon sa kahimtang sa mga lungsoranon nga nagpuyo sa Gaza, nga sentro sa panag-away.
Bisan og medyo may kalay-on ang Bethlehem sa Gaza, apektado gihapon kini sa nahitabong kasamok, tungod kay ang syudad maoy sentro sa turismo, usa sa mga sektor nga nag-unang naapektuhan sa giyera.
Karong tuiga, gibalik na usab ang mga magarbo nga parada sa lugar, lakip na ang bibo nga partisipasyon sa mga residente ug mga turista nga nagmaisugon sa pagsulod sa syudad.
Sa Manger Square, ang dapit sa Bethlehem diin gituohang natawo si Hesukristo, daghan na usab nga mga pilgrim ang gitugotan nga makigbahin sa parada ug uban pang mga kalihokan nga sagad abli alang sa mga turista.
Makita na usab ang mga dekorasyon sa Pasko sa hapit tanang bahin sa Bethlehem, dili sama sa milabay nga duha ka magkasunod nga Pasko.
Unang nagsugod ang giyera tali sa Hamas ug Israel niadtong Oktubre 2023, diin liboan na ka mga tawo ang nangamatay, nawala, ug nangasamad.
Photo courtesy: JOHN WESSELS/ AFP
