Gi-deny sa Regional Trial Court Branch 3 ang petisyon alang sa Declaratory Relief ug Temporary Restraining Order batok sa pagpatuman sa City Ordinance No. 22-7196 nga nagpasirado sa Colegio de Iligan o CDI.
Sa desisyon sa korte nga gipagawas niadtong Disyembre 9, 2025, giila nga balido ug makatarunganon ang maong ordinansa.
Giklaro sa hukom nga ang ordinansa dili supak sa balaod o sa Konstitusyon, dili pabor-pabor o diskriminatory, ug gihimo alang sa kaayohan sa publiko, ilabi na sa mga estudyante sa CDI.
Giingon usab sa korte nga napugos ang syudad sa paglihok tungod kay wala makakuha ang eskuylahan og Institutional Recognition o IR, ug Certificate of Program Compliance o COPC.
Matod pa, kung wala kini nga mga dokumento, dili makakuha ang mga estudyante og Special Order ug Certification, Authentication, and Verification, nga mahimong makaapekto sa ilang pag-graduate, pagkuha sa board exam, ug kaugmaon.
Girecognize usab sa korte ang mga lakang sa City Government aron matabangan ang mga estudyante, lakip na ang pag-transfer sa laing Higher Education Institutions, subsidy sa tuition, pag-credit sa mga units nga nakuha na, ug pagsiguro nga walay pinili o pamulitika sa pagpatuman sa ordinansa.
Gipasidunggan usab sa korte ang kadaghanan sa mga estudyante nga nakagraduate ug nakapasar sa licensure examinations.
Sa iyang Facebook post, giingon ni Iligan City Mayor Frederick Siao nga ang desisyon dili lang bahin sa pagdaog sa kaso, kundili bahin sa pagpanalipod sa estudyante, kalidad sa edukasyon, ug kaayohan sa mga Iliganon.
Nunot niini, nagpasalamat ang amahan sa siyudad sa klaro ug patas nga desisyon nga makaluwas sa kaugmaon sa kabatan-onan ug maghatag og husto nga direksyon sa siyudad.
Photo courtesy to:PNA
