Gipahugtan sa City Social Welfare and Development Office (CSWD)–Iligan ang pag-monitor sa street children, street family, ug mga Badjao sa syudad, sumala ni Maria Luisa Baculi-Yap, Focal Person for Street Children, gikan sa Dangpanan sa Kabataan Center.
Aktibo ang CSWD sa paglibot sa tibuok siyudad aron masuta ug masiguro nga dili na magpadayon sa pagpanglimos sa kadalanan ug establisemento ang mga street children ug street family. Sa matag tawag o report gikan sa publiko, gilayon kini nilang girespondihan.
Sa mga operasyon, kauban ang CSWD ang Philippine National Police (PNP), ilabi na ang Iligan City Police Station 5 ubos sa kamanduan ni PMJ Neil Mark Quipanes, nga mipasalig sa hingpit nga suporta sa mga kalihokan. Sa miaging bulan, tulo ka higayon nga natabangan sa ICPS 5 ang CSWD sa ilang field operations.
Sumala pa ni Yap, mas epektibo ang pagbadlong sa street family ug Badjao batok sa pagpanglimos kon adunay presensya sa mga personnel sa PNP, tungod kay mas motuman sila sa pahimangno sa awtoridad.
Photo Courtesy to: GMA
