Nameligro ang kinabuhi sa mga empleyado sa Lapu-Lapu City Hall human kini gitumbok sa Commission on Audit (COA) nga wala kini makatuman sa gikinahanglan nga fire safety measures, sumala sa 2024 audit report sa ahensya.
Base sa report sa COA,anaa sa risgo ang kahimtang sa mga empleyado sa City Hall ilabina kon adunay mahitabong sunog.
Tungod niini, giplano sa COA ang pakig-alayon sa Bureau of Fire Protection (BFP) aron masusi ang City Hall ug tanang mga building nga gipanag-iya sa lokal nga kagamhanan sa Lapu-Lapu City, aron masusi ang mga posibleng fire hazard ug mabuhatan dayon ug tukmang aksyon.
Sumala ni Fire Superintendent Arnel Abella, ang Fire Marshal sa Lapu-Lapu City Fire District, hangtod karon wala pa silay nadawat nga opisyal nga report gikan sa COA bahin sa maong report.
Si Abella bag-o pa milingkod isip Fire Marshal sa dakbayan niadtong Hulyo ning tuiga. Samtang giangkon usab ni Mayor Cindi King-Chan nga sa iyang paglingkod sa katungdanan niadtong Hulyo, iyang namatikdan nga limitado ang mga fire extinguisher sulod sa City Hall. Apan giingon sa mayor nga aduna na’y gihimo nga mga lakang aron masulbad ang problema.
