Nagpagawas ug pahimangno ang Land Transportation Office (LTO) Davao de Oro ngadto sa mga driver bahin sa posibleng mga silot nga ilang maatubang kung magmaneho nga hubog, ilabi na karong panahon sa kapaskuhan.
Nabisita sa Juander Radyo News Team ang buhatan sa LTO Davao de Oro aron mahibal-an ang ilang mga programa ug hugot nga pagpatuman sa balaod, tungod kay kasagaran ning panahona mosaka ang ihap sa mga disgrasya sa kadalanan.
Sumala kang Angelo Tiongson, Public Utilities Regulation Officer sa LTO Davao de Oro, ang bulan sa Disyembre mao ang panahon nga pinakadaghan ang insidente sa kadalanan, ug usa sa mga nag-unang hinungdan niini mao ang pag-inom ug ilimnong makahubog og dayon pagmaneho.
Dugang pa ni Tiongson nga bug-at kaayo ang kaso kung ang usa ka driver nga hubog malambigit sa disgrasya nga mosangpot sa kamatayon. Posible kining tangtangan sa lisensiya ug permanenteng dili na tugotan nga makapadagan og bisan unsang sakyanan.
Nag-awhag ang LTO sa tanang motorista nga magpuyo nga responsable ug likayan ang pagmaneho kung nakainom, aron malikayan ang disgrasya ug masiguro ang luwas nga selebrasyon sa kapaskuhan.
