Magsaulog sa pasko og bag-ong tuig sulod sa prisohan ang usa ka indibidwal human nadakpan sa mga otoridad sa gikasang Manhunt Charlie operation didto sa Purok Tandawan, Barangay Maglahus, Cateel, Davao Oriental pasado ala 1:00 sa hapon niadtong Disyembre 14, 2025.
Ang operasyon gihimo sa mga personahe sa Cateel Municipal Police Station, uban sa mga operatiba sa CIDG DORFU, RIU 11, 1st DOPMFC ug uban pang law enforcement units nga nagresulta sa pagkasikop ni alyas “Jey”, 26-anyos, adunay kalive-in partner, usa ka laborer nga gikonsiderang Top 2 Most Wanted Person ug residente sa maong probinsya.
Naaresto ang suspek pinaagi sa pagpatuman sa warrant of arrest alang sa kasong Rape ubos sa Art. 266-A(1) nga maykalabotan sa Art. 266-B sa Revised Penal Code (RPC) ilalom sa Criminal Case Number 5338-2025 mga giisyu sa Presiding Judge sa Regional Trial Court, 11th Judicial Region, Branch 7, Baganga, Davao Oriental, pinetsahan niadtong Nobyembre 3, 2025 ug walay pyansang girekomendar ang korte.
Gipasabot usab ang akusado sa rason sa iyang pagkasikop pinaagi sa iyang katungod ug sa pinulongan nga iyang nahibal.an. Sa pagkakarun ang dinakpan gikustodiya na sa Cateel Municipal Police Station alang sa tukmang disposisyon.
Ang operasyon nagpakita sa kalampusan sa kapulisan ug usa ka dakong lakang sa kampanya sa pagsumpo sa kriminalidad sa rehiyon. Kini nga lakang dungan nga kampanya kontra kriminalidad o Simultaneous Anti Criminality Campaign (SACLEO) nga nagpakita sa pagpatuman sa balaod.
Photo Courtesy to: PCR Cateel
