Gikumpirma ni Philippine Ambassador to Thailand Millicent Cruz-Paredes nga adunay 118 ka Pilipino ang gipabakwit sa Thailand tungod sa nagpabiling tensiyon sa border tali sa Thailand ug Cambodia.
Sumala sa embahada, kadaghanan sa mga gipabakwit mao ang mga Filipino teachers nga nagtrabaho sa mga probinsiya nga labihan ang epekto sa kagubot.
Sa kasamtangan, adunay kapin 350 ka dokumentadong Pilipino nga nagpuyo sa pito ka border provinces sa Thailand, apan 118 ka mga indibidwal ra ang direktang naapektuhan ug kinahanglan ipabakwit.
Gisiguro usab ni Ambassador Cruz-Paredes nga magahatag ang embahada og pinansyal nga tabang sa mga apektadong Pilipino, ilabi na sa mga nagtutudlo sa mga tunghaan sa border provinces nga napugos og pagkansela sa klase tungod sa kagubot.
Padayon ang monitoring sa Embahada sa Pilipinas sa Thailand aron masiguro ang kahimtang ug kaluwasan sa mga Pilipinong inilikas.
Photo courtesy: ABC News
