Landig sa balay tambalanan ang usa ka lalaki human kini dunggaba sa iyang kauban sa trabaho sa dihang wala kini mitabang sa pagpanghugas ug plato. Ang biktima naila nga si alyas Jaymark, 32-anyos samtang giila usab ang suspek nga si Alyas Efren, 31-anyos pulos mga residente sa Barangay San Isidro, General Santos City.
Matod pa sa suspek nga giingnan niini ang biktima nga motabang sa pagpanghugas plato apan nagdumili kini ug nakafocus sa pagdula-dula sa iyang selpon. Tungod sa kalagot sa suspetsado, wala niini napugngan ang kaugalingon hinungdan nga mikuha kini og hait nga hinagiban dayon dunggab sa lawas sa biktima.
Daling gidala ang biktima sa pinakaduol nga balay tambalanan alang sa medikal nga atensyon. Samtang ang suspek dali gilayong nasikop sa mga mirespondeng kapulisan.
Sa karon dako matod pa ang pagmahay sa suspetsado ug nangayo na usab kini ug pagpasaylo sa ginikanan sa biktima.
Photo Courtesy to: Shutterstock
