Mihangyo ang pamilya ni Barangay Tres de Mayo Kapitan Oscar “Dodong” Bucol Jr. sa Philippine National Police (PNP) nga sabton ang ilang desisyon nga ang National Bureau of Investigation (NBI) unta ang mangulo sa imbestigasyon sa pagpamusil-patay sa kapitan.
Sumala ni Atty. Israelito Torreon, abogado sa pamilya, ang ilang hangyo naggikan sa kabalaka nga usa sa gitudlo nga person of interest sa kaso mao ang usa ka miyembro sa kapulisan, hinungdan nga dili maayo tan-awon nga ang PNP maoy mo-imbestiga sa ilang kaugalingong kauban.
Dugang pa niya nga usa usab ka rason sa desisyon sa pamilya, mao ang ilang pagbati nga walay dayon aksyon ang gihimo sa kapulisan human sa insidente. Matod ni Torreon, wala sab sila dayon nakaangkon ug spot report o progress report gikan sa PNP kalabot sa kaso hangtod karon.
Nanghinaot si Torreon nga dawaton kini sa kapulisan isip constructive criticism nga makatabang sa pagpalambo sa ilang operational procedures kung aduna man kini nga aspeto nga nanginahanglan pag-ayo.
Gipasiugda ni Torreon nga kung adunay imbestigasyon nga buhaton ang PNP, hangyo sa pamilya nga i-coordinate kini sa NBI aron masiguro ang transparency ug pagsalig sa proseso.
Bisan pa sa ilang mga kabalaka, giila gihapon sa pamilya nga nakalihok na ang PNP ug nagsugod sa ilang aksyon sa ika-11 o ika-12 ka adlaw human sa pagkamatay ni Kap Bucol.
