Patay ang usa ka Sangguniang Bayan member sa Marihatag, Surigao del Sur human kini giluba pasado alas 7:20 kaganihang buntag, Disyembre 6, 2025, didto sa Purok Pagbahaan 1, Barangay Poblacion, Marihatag, Surigao del Sur.
Ang biktima giila nga si Gerry Sales Campos, 53-anyos, minyo, ug residente sa Purok 2, Barangay Sta. Cruz, Marihatag Surigao del Sur.
Base sa paunang imbestigasyon sa Marihatag Municipal Police Station, nga samtang minaog ang biktima gikan sa iyang sakyanan, kalit lang mitumaw ang suspek nga giilang si Sandy Constanin Rivas, 43-anyos, single, laborer, ug residente sa Purok 1, Barangay Sta. Cruz, Marihatag. Walay pagduha-duha nga gidunggab sa suspek si Campos sa makadaghang higayon gamit ang usa ka taas ug hait nga kutsilyo. Gituohang personal nga dumot ang hinungdan sa maong krimen.
Human sa insedente daling gidala sa balay tambalanan ang biktima apan gideklarar na kini nga dead on arrival.
Dali usab nga nadakpan sa duty beat patrollers ang suspetsado, ug karon kini nakakustodiya sa Marihatag Municipal Police Station samtang giandam na ang tanang dokumento alang sa inquest proceedings.
Photo Courtesy to: Gerry Sales Campos fb page
