Mokabat na sa kapin sa 1,500 ka mga tawo ang kumpirmadong namatay sa kusog nga pagbaha sa miaging semana nga miigo sa Asya ug tungod niini ang mga emergency crew padayon nga nagpahigayon ug rescue operations alang sa mga namissing.
Gikataho nga naglisod pa ang mga rescue team ug nanginahanglan ug dugang personahe sa alang sa pagluwas. Matod pa sa mga otoridad nga adunay 883 ka mga indibidwal ang namatay sa Indonesia, 486 usab sa Sri Lanka, 185 sa Thailand ug tulo sa Malaysia.
Daghang mga kabalayan sa Indonesia ug Sri Lanka ang nagpabilin nga nalubong ilawom sa lapok nga adunay dul-an sa 900 nga mga tawo nga wala pa makit-an, samtang nagpadayon pa usab ang rescue operation sa Thailand ug Malaysia.
Daghan usab nga nahugno nga mga transmission tower ug ang mga baryo sa lugar halos nga dili na maporma tungod sa kadaot. Samtang gibutyag ni National Disaster Management Agency Abdul Muhari nga naglisud ang mga sakyanan nga nagdala ug mga suplay sa hinabang sa duha ka lungsod sa Medan sa North Sumatra hangtod sa Aceh Tamiang.
Kalabot niini, gihulagway sa usa ka Associated Press nga photojournalist nga kaylap ang kadaot sa Aceh Tamiang human nga miigo ang kalit nga pagbaha ug nangadamay pa ang mga sakyanan sa maong lugar.
Kahinumdoman nga niadtong 2004 miigo ang tsunami sa Aceh ug mipatay sa dul-an 230,000 ka mga tawo ug nagbilin sa tukmang kadaot.
Photo Courtesy to: Steemit
