Nagpakita sa dakong kalipay ug pagpasalamat ang Tandawan Integrated School sa New Bataan, Davao de Oro human kini mapili nga usa sa mga benepisyaryo sa Pamaskong Handog Outreach Program nga gipangunahan sa Davao de Oro Provincial Police Office (DDO-PPO) uban sa mga tinabangay nga sponsors, ilabi na ang FCGI Company, niadtong Disyembre 4, 2025.
Sumala sa Principal nga si Fernando Comaling, ang maong programa dili lamang naghatag og materyal nga panabang, kondili nakahupay usab sa kasing-kasing sa komunidad, ilabi na kay nagtimaan kini sa ika-13 ka tuig nga anibersaryo sa Bagyong Pablo, nga mipas-an og dakong trahedya sa lugar.
Dugang pa niya nga dakong kalipay ang nabati sa mga ginikanan, magtutudlo, ug estudyante tungod sa programa nga naghatag og inspirasyon ug nagpalig-on sa ilang pagsalig sa kaugalingon.
Ang Pamaskong Handog nagpadayag sa tinuoray nga espiritu sa Pasko pinaagi sa pag-abot sa kalipay, paglaum, ug suporta sa tibuok komunidad. Nagpakita kini sa tinud-anay nga pag-alagad ug pagkamaayo sa lokal nga panggamhanan ug kapulisan alang sa katawhan sa New Bataan.
