Gipasidunggan sa Regional Association of Treasurers and Assessors of Region 10 (REGATA 10) ang City Treasurer’s Office (CTO)–Iligan City tungod sa ilang iladong kaisog, tin-aw nga direksyon, ug lig-on nga performance sa pagkolekta og buhis alang sa Fiscal Year 2024.
Gipahigayon ang maong tinuig nga pag-ila sa Pearlmont Hotel, Cagayan de Oro City, niadtong Disyembre 1 hangtod 4, 2025.
Ang REGATA 10 maoy dakong panagtigom sa mga treasurer ug assessors sa tibuok Northern Mindanao, usa ka tigom diin makita ang labing maayong pamaagi, mga pagpaningkamot, ug mga inobatibong lakang sa sektor sa panalapi sa lokal nga panggobyerno.
Midawat sa Plaque of Recognition si Acting City Treasurer Analie O. Pabroquiz ug City Assessor Evan Puyos, gikan mismo kang BLGF OIC Regional Director Erwina Grace P. Morales, isip timaan sa ilang halangdong pagdumala ug kaugmarang gipaabot sa ilang departamento.
Giila ang CTO–Iligan isip Top 2 sa Performance Indicator Area 2: Highest Local Source Revenue kon (LSR) Collections alang sa Fiscal Year 2024 sa kategoriya sa siyudad, diin usa ka timailhan nga ang Iligan nagpabiling lig-on sa panalapi ug stable ang local revenue generation.
Tungod sa matinud-anon nga paningkamot, maayong pagdumala, ug walay puas nga pagtinabangay sa matag kawani, nakahimo ang CTO sa pagkolekta sa mokapin 8million pesos nga Local Source Revenue.
Kini nagpakita sa ilang ligdong nga serbisyo publiko, hugot nga estrategiya sa tax collection, ug padayon nga tinguha nga mapalig-on ang pondo sa lokal nga pamunuan alang sa mas malambuong syudad sa Iligan.
Photo courtesy to: ILIGAN CITY-LGU
