Napalgang patay ang usa ka delivery boy sa LPG sa sayong kadlawon sa Mantawi Drive, Barangay Subangdako, Dakbayan sa Mandaue. Ang insidente nakapukaw sa katawhan sa lugar human masuta nga nagbitay ang biktima sa usa ka punoan sa kahoy.
Giila ang biktima sa alyas nga si ” Justine ” 30 anyos, lumad taga Sitio Naloy, Brgy. Bunawon, Siaton, Negros Oriental apan nagpuyo karon duol sa dapit diin siya nakit-ang patay.
Ang nagreport sa panghitabo mao si Orly Damostrico, residente sa Sitio Fatima, Brgy. Maguikay, nga nakakita sa lawas sa biktima samtang niagi sa center island.
Sa imbestigasyon sa Subangdako Police Station, gisulti sa igsuon sa biktima nga dugay na kining gagamit og iligal nga droga, ug gituohang posibleng mao kini ang misangpot sa iyang pagpanimalos sa kaugalingon.
Apan laing anggulo usab ang gitan-aw sa pulisya human sa pahayag sa higala sa biktima nga si Chris Miguel Quirit. Matod niya, basin adunay kalabotan sa relasyon sa uyab ni Justine ang kagubot nga nagdala kaniya sa pagpakamatay. Si Chris Miguel misaysay nga sa gabii sa Domingo, nakita pa niya ang biktima nga dili mahimotang, sige’g sulod ug gawas sa tindahan diin siya nagtrabaho.
Pasado alas 11 sa gabii, nakadawat matod pa kini og mensahe gikan sa uyab sa biktima nga nagpatabang tungod maghikog si Justine. Dali niya kining giadtuan ug nasakpan nga hapit na kini magbitay, maong iyang gibadlong ug gidala balik sulod sa ilang trabahoan. Apan milapas ang usa ka oras, nadungog na lang niya ang balita nga nakita na ang biktimang patay na, hinungdan nga dili siya katuo nga migawas pa kini aron padayonon ang buot niyang buhaton.
Photo Courtesy to:CSVR
