Giablihan niadtong Lunes Disyembre 1, 2025 ang Primary HIV Care Facility sa City Health Office (CHO) nga nahimutang sa TTMF Del Carmen, duol sa Super Health Center.
Gitukod ang pasilidad aron mas mapalig-on ang serbisyong panglawas ug mahimong accessible ang mga serbisyo nga maykalabutan sa HIV prevention, testing, ug treatment alang sa mga residente sa Iligan.
Gipangulohan sa mga opisyal sa CHO ang inagurasyon uban sa lig-on nga suporta gikan sa Iligan City AIDS Council ug sa lokal nga panggamhanan.
Ang bag-ong pasilidad naglakip og HIV counseling, confidential testing, treatment initiation, antiretroviral (ARV) refill, ug health education sessions.
Gilauman sa mga opisyal nga pinaagi sa pag-operate sa maong pasilidad, maminusan ang stigma nga nagpalibot sa HIV ug mas daghang katawhan ang ma-engganyo nga magpa-test ug magpavertical check-up.
Matod pa ni Dr. Wellaflor Brito, Head sa Infectious Disease Cluster sa DOH Region X, nga ang pag-abli sa facilities usa ka mahinungdanon nga lakang sa pagpalig-on sa public health initiatives sa syudad.
Mahinungdanon kini sa pag-atubang sa pagtaas sa kaso sa HIV ug sa paghatag og de-kalidad nga serbisyo /ngadto sa tanang pasyente nga nagkinahanglan niini.
Gihangyo usab sa City Health Office ang publiko nga makig-uban sa maong paningkamot pinaagi sa pagpakaylap sa hustong impormasyon, pagbatok sa diskriminasyon, ug pagpalig-on sa kooperasyon tali sa komunidad ug mga health workers.
Photo Courtesy to: City Information Office
