Nakadawat og dakong pasidungog ang Sangguniang Bayan sa Alicia, Zamboanga Sibugay, nga gipanguluhan ni Vice Mayor Ismael Balida Escamillan Jr., human kini mahimong Top 2 sa Provincial Level ilawom sa 1st–3rd Class Category sa 2025 Local Legislative Awards kon (LLA). Ang SB nakakuha og total average nga 88.18%, sumala sa mga indicator ug guidelines nga gisunod sa Local Legislative Awards Committee.
Ang LLA usa ka prestihiyosong programa nga nag-ila sa kalampusan ug ka-epektibo sa mga lokal nga lehislatura sa tibuok nasod. Gi-evaluate niini ang kapasidad sa Sangguniang Bayan sa paghimog tin-aw, gipaluyohan ug napatuman nga mga ordinansa, kalidad sa legislative documents, legislative tracking, ug ang paghatag og public access sa impormasyon ug uban pa.
Sa pag-angkon sa Top 2 ranking, gipakita sa SB Alicia ang ilang padayon nga paningkamot sa pagpatuman og maayo, hapsay, ug responsableng paglegislar alang sa kalamboan sa lungsod. Gilauman nga ang maong pasidungog mosuporta sa mas lig-on nga implementasyon sa mga programa ug polisiya nga makatabang sa kahimtang sa tanang Aliciahanon.
Ang maong pag-ila usab nagpakita sa aktibong kolaborasyon tali sa executive ug legislative branch sa lungsod, nga nagtumong sa usa ka mas episyente ug responsive nga lokal nga pamunuan. Gipasalamatan usab sa SB ang suporta sa katawhan sa Alicia, nga mao’y padayon nilang inspirasyon sa pagserbisyo.
Ang Sangguniang Bayan sa Alicia nagpadayong pasalig sa paghatag og kalidad nga serbisyo-publico pinaagi sa lig-on, patas, ug tin-aw nga lokal nga lehislasyon.
