Posibleng mahimong obligasyon para sa tanang graduating students sa senior high school ug kolehiyo sa Mandaue City ang pagtanom og duha ka kahoy matag estudyante, human nga ang City Government misulong og bag-ong environmental initiative aron mapalambo ang proteksyon sa kinaiyahan ug maminusan ang peligro sa kalamidad.
Nasugdan ang lakang human makapasa sa first reading ang usa ka ordinansa sa Mandaue City Council nga nagmando nga ang tanang graduating students, gikan sa pampubliko man o pribadong eskwelahan, kinahanglan magtanum og duha ka kahoy isip usa ka civic responsibility alang sa pagpanalipod sa kalikupan.
Si Sangguniang Kabataan Federation President ug ex-officio Councilor Fleuritz Gayle Jumao-as, ang nag-authored sa ordinansa, mitumbok nga ang maong lakang makatabang sa pag-address sa flooding ug deforestation nga problema sa dakbayan. Gidugang niya nga gilauman nilang masugdan dayon ang implementasyon sa programa.
Ang Department of Agriculture (DA) ang mohatag sa mga seedlings nga gamiton alang sa tree-planting program. Sa iyang bahin, si Councilor Jennifer del Mar, co-author sa ordinansa, misulti nga importante nga matudluan ang kabatan-onan sa sayo pa mahitungod sa environmental stewardship, ilabina karon nga mas gibati na ang epekto sa climate change.
Gipadayag usab niya nga motutok ang dakbayan sa monitoring sa implementasyon ug pag-ila sa angay nga klase sa mga kahoy nga itanom sa nagkadaiyang dapit sa syudad. Gidugang ni Del Mar nga ang maong lakang usa lamang ka bahin sa mas lapad nga paningkamot sa Mandaue City aron mapalig-on ang environmental protection initiatives niini.
Photo Courtesy to: Gharpedia
