Gipahigayon sa Philippine Information Agency (PIA) Davao de Oro ang usa ka Kapihan sa PIA sa 2nd floor sa NCCC, Nabunturan, Davao de Oro bag- ohay pa lamang. Ang komperensya nagtumong aron hisgutan ang isyu sa kabataang nagtrabaho nga wala pa sa hustong pangidaron.
Sa pakighinabi sa Juander Radyo News Team ni Lym R. Ongoy, ang Senior Labor Officer sa Department of Labor and Employment (DOLE) Davao de Oro, iyang gibutyag nga ang industriya sa mining usa sa mga nakapahimo sa kabataan nga magtrabaho, ug kini usa sa mga rason nga ang uban dili na makapadayon sa ilang pag eskwela tungod kay biktima na sila sa child labor.
Gidugang pa ni Ongoy nga daghan na silang gihimo nga mga programa ug kampanya aron pahinumdoman ang katawhan nga ang gobyerno andam mohatag ug suporta aron malikayan ang child labor ug maprotektahan ang mga kabataan.
Matod pa niya, padayon ang paningkamot sa gobyerno sa paghatag ug suporta alang sa katawhan, labi na sa mga kabatan-onan nga anaa sa peligro sa iligal nga pagtrabaho.
