Nasakmit ang upat (4) ka tikasan nga timbangan sa Lapu-Lapu City Public Market atol sa gihimong special operation sa Market Administrator’s Office. Ang operasyon gisugdan human mikatap sa social media ang reklamo sa usa ka customer nga nabiktima sa timbangan sa fish section.
Sumala ni Ma. Elena Caballes, Market Administrator sa Lapu-Lapu City, ang ilang buhatan mihimo dayon ug espesyal nga operasyon aron ma-verify ang tinuod nga impormasyon human makita ang viral post nga nagpakita sa pagpanglimbong pinaagi sa timbangan.
Sa ilang pagsusi, tulo (3) ka timbangan sa fish section ug usa (1) ka timbangan sa meat section ang ilang nasuta nga adunay discrepancy o dili takdong timbang, hinungdan nga dali nila kini nasakmit.
Usa sa mga natimingan sa operasyon mao ang timbangan nga nakuhanan ug video sa usa ka netizen. Human niini, midiretso ang Market Administrator’s Office sa City Legal Office aron mohatag ug pormal nga report ug nagpaabot karon unsang sanksyon ang ipahamtang sa mga responsable.
Ubos sa City Ordinance, ₱500 ang multa alang sa first-time offenders, samtang mas grabe nga penalty ang ipahamtang sa mga madakpan nga balik-balik nga mogamit ug tikasan nga timbangan.
Photo Courtesy to: Lapu-lapu City Information Office
