Gikumpirma sa mga otoridad nga usa ka piloto ang nakabsan sa kinabuhi human nga nagbangga ang duha ka light aircraft sa tunga-tunga sa kahanginan didto sa habagatan-kasadpan sa Sydney, Australia kagahapong adlawa, Dominggo, Nobyembre 30, 2025.
Sumala sa kapulisan human sa taho sa pagkahagsa sa mga ayroplano, dali gilayon kining girespodihan ug nagpadala ug emergency services pasado alas 12:15 sa udto sa susamang petsa.
Base sa report, nga nagsugat sa ibabaw sa kahanginan ang duha ka eroplano ug ang usa niini nahagsa ngadto sa usa ka lasang nga lugar. Sa pagpahigayon ug rescue operations usa ka piloto nga wala nay kinabuhi ang nakaplagan kinsa gituohan usab nga nag-inusara sa pagpalupad. Samtang luwas ra usab ang usa ka piloto ug malampusong naka landing sa Wedderburn airfield.
Sa pagkakaron ang Australian Transport Safety Bureau uban sa mga kapulisan nagpadayon ang imbestigasyon aron mahibal-an ang hinungdan sa pagbangga sa duha ka eroplano.
Photo Courtesy to:Dialogue Pakistan
