Gipalig-on sa local nga panggamhanan sa syudad sa Iligan ang kahibalo ug kapasidad sa mga VAWC Desk Officers pinaagi sa usa ka training nga nagtutok sa Data Privacy aron masiguro ang husto nga pagdumala ug pagpanalipod sa sensitibong impormasyon may kalabotan sa mga kaso sa Violence Against Women and Children (VAWC).
Ang maong pagbansay gitambongan sa 44 ka VAWC Desk Officers gikan sa matag barangay sa dakbayan. Usa sa mga nagsangkap sa impormasyon mao ang representante sa Information and Communication Technology Center (ICTC) nga mituki sa unod ug hinungdan sa Data Privacy Act of 2012 kun (RA 10173).
Sumala ni Al Madale, ang chief sa Gender and Development Office nga bisan pa man og simple ang dagan sa training, importante kini aron mas mapalapdan ang pagsabot sa mga desk officers sa hustong paagi sa pagdumala sa datos nga ilang makolekta, lakip na ang saktong pag-archive sa mga dokumento sa ilang mga kliyente.
Samtang si Jephine Apostol gikan sa City Social Welfare and Development (CSWD) nagpahimangno sa mga partisipante nga lig-on nilang bantayan ang seguridad sa mga file aron mapabilin ang pagsalig sa mga biktima nga misalig sa ilang serbisyo.
PHOTO COURTESY TO:LGU ILIGAN
