Gipahibalo sa Directorate General of Health Services (DGHS) nga 364 ang namatay karong tuiga tungod sa kaso sa Dengue sa Dhaka, Bangladesh, diin 86 niini karong bulan sa Nobyembre nga natala.
Mokabat na sa kapin 90,264 ang kinatibuk-ang ihap sa mga kaso tungod sa Dengue diin adunay 778 niini mga bag-ong nadala sa balay tambalanan ug 87,442 usab niini ang anaa na sa ilang tagsa-tagsa ka pinuy-anan.
Gibutyag sa usa ka entomologist nga si Kabirul Bashar sa Jahangirnagar University nga ang nag-unang rason sa daghang mga kaso sa Dengue mao ang pagbag-o sa klima. Samtang ang maong kaso mikaylap na sa tibuok nasud, diin lakip na niini ang habagatan-sidlakang lungsod sa Chattogram, sa habagatan-sentral sa lungsod sa Barisal ug amihanan-sentral sa lungsod sa Mymensingh.
Kasagaran matod pa magsugod ang tingtugnaw nga klima sa Bangladesh matag Nobyembre ngadto na sa Pebrero. Tungod sa pag-ulan kini ang makaimpluwensya sa pagpakita sa kaso dengue.
Kahinumdoman nga niadtong 2023, gitaho sa Bangladesh ang rekord nga 1,705 ang namatay tungod sa dengue nga gikan sa 321,179 sa nakumpirma nga mga kaso. Kini nga record naghimo sa pinaka makamatay nga outbreak sa nasud.
Photo Courtesy to: Pharma Boss
