Mokabat sa 17,828 ka pamilya o 59,828 ka indibidwal gikan sa 40 ka barangay sa Surigao del Sur ang direktang naapektohan sa Tropical Depression (TD) Verbena, sumala sa datos nga gipagawas sa Provincial Disaster Risk Reduction and Management Office (PDRRMO).
Ang TD Verbena misulod sa Bayabas, Surigao del Sur niadtong Lunes sa hapon, Nobyembre 24, 2025. Kini nga weather disturbance nakaapekto sa dakong bahin sa Caraga Region, nagdala og moderate hangtod heavy rains nga hinungdan sa mga pagbaha.
Sa tibuok Surigao del Sur, 613 ka pamilya o 2,426 ka indibidwal ang mibakwit gikan sa ilang panimalay didto sa 15 ka designated evacuation centers.
Pinakadaghan sa mga naapektuhan ang lungsod sa Carrascal nga mokabat sa 8,860 ka pamilya o 21,579 ka indibidwal sa 14 ka barangay; ikaduha ang Marihatag nga adunay 5,866 ka pamilya o 23,171 ka indibidwal sa 12 ka barangay; ug sa Lanuza, mokabat sa 2,728 ka pamilya o 13,642 ka indibidwal sa 13 ka barangay.
Nagpadayon usab ang pagpanghatag og ayuda gikan sa mga lokal nga panggamhanan ngadto sa mga apektadong pamilya.
Photo courtesy: MDRRMO-Carrascal
