Gipadangat na sa hawanan sa konseho sa syudad sa CDO ang kalabot sa kontrobersiya sa wala nahuman nga Mega Health Center sa Macanhan, Barangay Carmen.
Sa special report ni Konsehal Imee Moreno, sa nilabay nga sesyon, iyang gipunting nga kinahanglan og tubag ang katawhan kung unsa nay tinuod nga status sa nahisgutang proyekto labi pa mga poste lamang ang makita nga nakatukod ug hangtud karon wala pa kini nahuman nga dapat bulan sa enero ning tuiga ginalauman nga mahuman kini.
Inay hinanaling tubagon kini nga isyu, nahimong “battle of interviews” ang nahitabo, tali sa kontraktor sa proyekto ug sa executive department sa syudad.
Saysay pa ni Moreno nga bisan sila sa konseho daghang mga pangutana susama sa katawhan apan wala sab silay makuha nga saktong tubag. Busa gihangyo sa konsehal nga adunay mahitabong committee meeting labi na committee hearing ug panginahanglan sa usa ka full technical audit aron nga maklaro na ang tanan.
Gipunting sa konsehal nga dili lang kini simpleng problema sa pamolitika apan problema kini sa pagtubag sa panginahanglan sa serbisyong panglawas sa katawhan ug pag-angkon og accountability labi pa nga kwarta sa katawhan ang gigamit niini nga proyekto.
