Nagpadayon ang paningkamot sa Provincial Government of Bukidnon, kauban ang Department of the Interior and Local Government (DILG), sa pagpasiugda sa deradicalization program alang sa mga former rebels (FRs) ug friends rescued. Ang maong inisyatiba kabahin sa mas lapad nga kampanya sa gobyerno kontra lokal nga komunistang armado nga panagbangi pinaagi sa Ending Local Communist Armed Conflict (ELCAC) program.
Si DILG Bukidnon Provincial Director Rona Abadilla, sa eksklusibong pakighinabi sa Juander Radyo Malaybalay, miingon nga dugay na nilang gipatuman ang programa ug dakong kabahin kini sa pagtabang sa mga FRs nga moangkon pag-usab sa ilang papel sa komunidad. Tumong niini nga matabangan sila nga makalingkawas gikan sa daang ideolohiya ug makasabot sa gahom sa demokrasya, maayong panggobyerno, ug aktibong partisipasyon sa komunidad.
Matod ni Abadilla, ang deradicalization program adunay lima ka psychosocial development components: Moral recovery, Spiritual development, Ideological reorientation, Basic citizenship training, ug Physical development
Karon nga batch, 24 ka partisipante ang nakapadayon sa programa—18 ka lalaki ug 6 ka babaye—nga molungtad sulod sa 2 hangtod 3 ka bulan aron masiguro ang hapsay ug epektibong pagbag-o.
Bisan pa nga ang deradicalization center gikan sa national government, ang Provincial Government of Bukidnon gihapon maoy pondo ug operasyon niini pinaagi sa suporta sa Balay Silangan ug Balay Takalinaw nahimutang sa lungsod sa Imapsug-ong
via: DILG BUKIDNON
