Gikompirmar sa Mandaue City Hospital nga wala pa sila’y natala nga kaso sa leptospirosis base sa mga sample nga ilang napasa. Bisan pa daghang test requests ang nadawat, nagpabiling negatibo ang tanang resulta.
Sumala ni Dr. Ligaya Lakambini Dargantes, kinsa ang hospital chief sa Mandaue City nga dili pa makapahigayon og in-house testing ang tambalanan alang sa Leptospira bacteria, mao nga ilang ipadala ang mga sample ngadto sa pribadong ospital para sa kumpirmasyon.
Gipasalig niini nga gi-manage nila ang mga pasyente base sa ilang sintomas samtang nagpaabot pa sa resulta. Ang mga doktor misalig sa clinical assessment ug kung aduna may kumpiramdong pasyente sa leptospirosis diretsong hatagan kini og standard medication.
Bisan wala pay natalang kaso sa leptospirosis, nagpadayon ang Mandaue City Hospital sa pagbantay ug pag-andam pinaagi sa tukmang pag-manage sa mga pasyente. Gipasiugda sa ospital nga importante ang sayo nga assessment ug paghatag og tambal aron malikayan ang komplikasyon sa sakit.
Photo courtesy to: Mandaue City Hospital
