Unom (6) ka tawo ang namatay samtang baynte dos (22) pa ang nasamdan, lima niini anaa sa kritikal nga kondisyon, human mahitabo ang stampede sa usa ka military recruitment event sa El-Wak Stadium sa kapital nga siyudad sa Accra, Ghana.
Sumala sa Ghana Armed Forces (GAF), ang insidente nahitabo tungod sa wala damha nga pagsaka sa gidaghanon sa mga aplikante nga midagsa sa venue aron magsumite sa ilang aplikasyon aron mahimong sundalo.
Gipasabot sa militar nga liboan ka batan-on ang midagsa sa stadium sa paglaom nga moapil sa serbisyo, hinungdan sa taas nga unemployment rate sa nasud nga nag-aghat sa daghan nga mosulay sa pag-apil sa militar.
Human sa insidente, gipalugwayan sa Ghana Armed Forces ang recruitment period ug misaad nga ipatuman ang mas estrikto nga mga lakang sa crowd control aron malikayan ang susamang trahedya sa umaabot.
Padayon ang imbestigasyon sa mga awtoridad aron masayran ang ubang hinungdan nga misangpot sa maong insidente.
via: BBC/TRT AFRIKA
