Gihimgusgan sa Bukidnon Provincial Social Welfare and Development Office (PSWDO) ang mga programa alang sa pag-atiman ug proteksyon sa kabataan, ilabi na batok sa pagpang-abuso, sumala sa selebrasyon sa National Children’s Month karong bulana nga adunay tema nga “OSAEC-CSAEM Wakasan: Kaligtasan at Karapatan ng Bata, Ipaglaban!”
Sumala ni Provincial Social Welfare and Development Officer Ellen Salomintao, mitagana ang PSWDO ug kapin sa 30 milyones ka pesos alang sa mga programa nga nagpunting sa pag-atiman ug proteksyon sa mga kabataan.
Dugang niya nga aduna usab balay kapasilungan alang sa mga kabataan nga biktima sa abuso, mga kabataan nga wala nay pamilya, ug uban pang nagkinahanglan og espesyal nga pag-atiman.
Samtang, sa syudad sa Malaybalay, miingon si City Social Welfare and Development Officer Ivy Amor Urbina sa pakighinabe sa Juander Radyo Malaybalay nga nag-andam ang City Council ug mga programa alang sa kabataan sa tibuok bulan sa selebrasyon aron masiguro ang ilang proteksyon ug kaluwasan.
Ang mga lakang nga gihimo sa PSWDO ug sa Malaybalay City nagpamatuod sa seryosong pagtutok sa katungod ug kaluwasan sa kabataan sa Bukidnon.
