Mokabat sa usa ka libo ka classrooms ang nadaot sa lain-laing rehiyon sa nasud tungod sa paghapak ni Bagyong Tino, base sa pinakabag-ong situational report nga gipagawas sa Department of Education Disaster Risk Reduction and Management Service (DepEd DRRMS).
Sa maong report, 633 sa mga classrooms ang adunay minor damage, 275 ang adunay major damage, ug 267 ang total damage o hingpit nga nadaot. Kapin sa 7 milyon usab ka mga estudyante ug 332,276 ka mga kawani sa DepEd ang apektado sa bagyo.
Gibutyag usab sa DepEd nga 18,281 ka pampublikong tunghaan gikan sa 106 ka divisions sa 11 ka rehiyon ang napugos magdeklarar og suspension sa klase tungod sa kadaot ug peligro nga gidala sa bagyo. Samtang, 2,564 ka mga classrooms gikan sa 535 ka mga eskwelahan sa pito ka rehiyon ang gigamit gihapon isip evacuation centers alang sa mga residente nga naapektuhan sa pagbaha ug landslide.
Tungod niini, gibanabana nga molabaw sa ₱30 milyon ang kinahanglanon nga pondo alang sa pag-ayo, pagpintal, ug pagpanglimpyo sa mga nadaot nga classrooms sa tibuok nasud.
Gipadayag sa DepEd nga padayon ang ilang koordinasyon uban sa mga lokal nga opisyal ug ahensya sa gobyerno aron daliang mahatagan og ayuda ang mga naapektuhang eskwelahan ug magpabilin nga normal ang dagan sa edukasyon human sa kalamidad.
Photo courtesy: FILIPINOMIRROR
