Nasakmit sa Pasig City ang back to back nga kampiyonato sa bag-o lang nahuman nga Batang Pinoy nga gipahigayon sa syudad sa General Santos. Ang Pasig City nakadaog og kinatibuk-ang 95 ka bulawan, 72 ka silver ug 87 ka bronse nga medalya sa nagkalain-laing mga multisports event.
Gipildi nila ang Baguio City og upat ka bulawan nga medalya. Kahinumduman sa miaging tuig, ang Pasig City nakadaog og 105 ka bulawan nga medalya, 13 ka bulawan nga medalya labaw sa Baguio City.
Ang syudad sa Pasig nakadawat og Php5 milyon gikan sa Philippine Sports Commission. Ang ikaduhang pwesto makadawat og Php4 milyon, ang ikatulong pwesto makadawat og Php3 milyon, ang ika-upat nga pwesto makadawat og Php2 milyon ug ang kataposang pwesto makadawat og Php1 milyon.
Baguio City nakadaog og 91 ka bulawan, 72 ka silver ug 74 ka bronse nga medalya. Samtang ang syudad sa Davao naa sa ikatulong pwesto nga adunay 53 ka bulawan, 53 ka silver ug 65 ka bronse nga medalya, ang Quezon city naa sa ikaupat nga pwesto nga adunay 45 ka bulawan, 51 ka silver ug 57 ka bronse nga medalya ug ang Manila naa sa ikalima nga pwesto nga adunay 43 ka bulawan, 37 ka silver ug 32 ka bronse nga medalya.
Photo Courtesy to:Spin.ph
