Giangkon sa Philippine Olympic Committee (POC) nga mag-atubang og dakong hagit ang mga atleta sa nasod sa pagsalmot sa 33rd Southeast Asian Games nga ipahigayon sa Thailand karong Disyembre.
Matod ni POC President Abraham “Bambol” Tolentino, daghang mga kategorya nga mahimong makadaog og medalya ang mga atleta ang gitangtang sa programa. Gihatagan niya og ehemplo ang martial arts, diin gitangtang ang kategorya sa timbang.
Ang SEA Games sports program nahimong flexible, nga nagtugot sa host country nga maka-introduce og bag-ong sports nga dili kasagaran makita sa regional ug global competitions, ug mahimo usab nila nga i-adjust ang mga panghitabo ug kategorya sa matag dula.
Sa 2023 SEA Games sa Cambodia, ang Pilipinas mitapos sa ikalimang dapit nga may 58 ka bulawan, 85 ka silver, ug 117 ka bronze medals.
Nanghinaot si Tolentino nga mapadayon o mapalambo pa sa Pilipinas ang ranking niini sa umaabot nga kompetisyon. Mopadala ang Pilipinas og 1,600 ka atleta nga mosalmot sa SEA Games sa Thailand.
via: Philippine Olympic Committee
