Pormal nga mipirma ang Pilipinas ug Canada sa Status of Visiting Forces Agreement (SOVFA) atol sa seremonyas nga gipangunahan ni Defense Secretary Gilberto Teodoro Jr. ug Canadian Minister of National Defense David McGuinty sa dakbayan sa Makati.
Ang maong kasabutan mao ang unang Indo-Pacific SOVFA nga gipirmahan sa Canada uban sa Pilipinas, nga naglatid sa legal framework alang sa joint military activities sa duha ka nasud.
Pinaagi sa SOVFA, gihatagan og legal nga pag-uyon ang presensya sa mga langyaw nga militar sa Pilipinas kon adunay joint military exercises. Tumong niini nga palig-onon ang kooperasyon ug interoperability tali sa Armed Forces of the Philippines (AFP) ug sa Canadian Armed Forces.
Aron mahimong epektibo ang maong kasabutan, kinahanglan pa kini mapirmahan ni Presidente Ferdinand Marcos Jr. ug mapanag-iyahan og ratipikasyon sa two-thirds sa Senado.
Ang Canada mao na karon ang ikalimang nasud nga adunay Visiting Forces Agreement sa Pilipinas, human sa Estados Unidos, Japan, New Zealand, ug Australia.
Sumala sa Department of National Defense (DND), dako kining lakang alang sa seguridad ug depensa sa rehiyon, labi na sa pag-atubang sa mga hagit sa Indo-Pacific nga nagkinahanglan og mas lig-on nga panaghiusa sa mga alyado.
PHOTO COURTESY TO: GLOBAL NEWS
