Gisugdan na sa beteranong boksingero nga si Nonito “The Filipino Flash” Donaire Jr. ang iyang seryosong training alang sa iyang umaabot nga world title fight karong Disyembre 17, 2025, nga pagahimuon sa Tokyo, Japan.
Kauban sa iyang asawa nga si Rachel ug sa tibuok pamilya, miabot si Donaire sa Mactan, Cebu aron didto magpokus sa preparasyon ug kondisyon. Matod pa sa iyang kampo, duha ka higayon sa usa ka adlaw mag training ang 43-anyos nga boksingero, buntag alang sa cardio ug lakang, samtang hapon para sa sparring ug taktikal nga training.
Makigduwa si Donaire batok sa 29-anyos nga walay pildi nga Japanese boxer Seiya Tsutsumi, nga adunay rekord nga 12 ka duwa (8 knockouts, 3 draws). Sa pikas bahin, si Donaire adunay 43 ka kadaogan (28 knockouts) ug 8 kapildihan.
Kung magmadaugon si Donaire sa umaabot nga duwa, mahimong siya ang ikatulong pinakatigulang nga boksingero sa kasaysayan nga makadaog og world title.
Ang maong laban gikatakda unta alang kang Antonio Vargas gikan sa Estados Unidos, apan tungod sa personal nga problema human mamatay ang inahan ni Vargas, miatras kini ug gipili si Donaire aron mopuli isip kompetitibong challenger.
PHOTO COURTESY TO: JAKARTAGLOBE
