Gibutyag sa Iligan City Police Office (ICPO) ang ilang dakong kalampusan sa padayong kampanya batok sa smuggled nga mga sigarilyo sa Iligan City.
Matod ni PMAJ. Zandrex Panolong- Police Information Officer sa ICPO, nga gikan sa Enero hangtod Marso sa unang quarter sa 2025, nakakumpiska ang kapulisan og smuggled cigarettes nga mokantidad ug ₱1,025,200.
Sa ikaduhang quarter, gikan Abril hangtod Hunyo, misaka pa kini samtang sa ikatulong quarter o gikan Hulyo hangtod Septyembre, nakakumpiska ang ICPO og ₱4,800,000 nga mga smuggled nga sigarilyo.
Suma total, nakasakmit ang kapulisan og ₱5,915,100 nga kontrabando sulod lamang sa lima ka operasyon ning tuiga ug unom (6) ka mga indibidwal ang nasikop.
Dugang pa nga, dili lang kapulisan ang responsabli niini, tungod kay adunay mga market police nga nagbantay usab sa mga pampublikong merkado aron mosita ug mosikop sa mga nagbaligya sa mga ilegal nga produkto.
Giingon ni Panolong nga magpabilin nga alerto ang ICPO aron mapugngan ang pagsulod ug pagpanglimpyo sa mga kontrabando nga sigarilyo sa Iligan.
