27 ka public utility vehicle ang nagpositibo sa paggamit ug illegal nga druga atol sa pagpahigayon sa Oplan Harabas sa nagkadaiyang bahin sa Zamboanga Peninsula, adlawng Huwebes, Oktubre 30, 2025.
Ang kalihokan gipasiugdahan sa Philippine Drug Enforcement Agency Regional Office 9 (PDEA RO9) sa koordinasyon sa Land Transportation Office (LTO), Land Transportation Franchising and Regulatory Board (LTFRB), Philippine National Police (PNP), Highway Patrol Group (HPG), Philippine Coast Guard (PCG), City ug Provincial Anti Drug Abuse Council.
Dungan nga gihimo ang random drug testing sa nagkadaiyang mga terminal sa rehiyon nga naglakip sa Zamboanga City, Dipolog City, Pagadian City, ug sa Ipil, Zamboanga Sibugay sa tuyo nga masiguro ang kaluwasan sa mga commuters aron mapromotar ang drug free public transportation system sa panahon sa UNDAS.
Kinatibuk-ang 1,259 ka mga indibidwal ang napailawom sa drug testing diin 27 ang kinatibuk-ang nagpositibo, 7 niini gikan sa Zamboanga del Sur, 1 sa Zamboanga del Norte, 6 sa Zamboanga Sibugay ug 13 sa Zamboanga City.
Human sa drug test ang mga nagpositibo nga drivers giturn-over dayon sa kustodiya sa LTO alang sa pagbawi sa ilang mga Driver’s License, samtang gihuwat pa ang confirmatory test ug ang resulta sa nagpadayong imbestigasyon.
Samtang ang tanan nga mga nagpositibo gi-turn-over ngadto sa mga anti-drug abuse councils alang sa assessment aron sila mahatagan sa gikinahanglan nga interventions.
Niini, nagpaabot ug pasalamat si PDEA 9 Regional Director Bryan B. Babang ngadto sa tanang mga PDEA RO9 personnel lakip na sa tanang partner-agencies sa ilang mga sakripisyo ug kooperasyon alang sa malampusong aktibidad.
