KAPULISAN SA DAVNOR ANDAM NA ALANG SA UNDAS 2025

Andam na ang kapulisan sa probinsya sa Davao del Norte sa nagkaduol nga Undas kon kalag-kalag sa Nobyembre 1-2, 2025.

Sumala pa, nga ang tibuok pwersa sa Pulis Davnor gisiguro nga mamahimong luwas ang pahinumdom sa maong higayon.

Hugot nilang gipatuman ang mga mando sa lokal nga panggamhanan ilabi na ang mga ginadili nga mga gimbuhaton karong undas.

Samtang giawhag usab sa kapulisan ang katawhan nga mobisita sa mga sementeryo nga magdala og panangga sa init ug ulan, ginadili ang pagdala og hinagiban o makamatay nga mga butang, mga gamit sa sugal, speakers, ilimnong makahubog ug mga baligya.

Magdala og sakto nga pagkaon ug tubig mainom. Segurohon nga ang mga kandila nga gidagkutan dili makahimo og sunog o disgrasya. Angayan usab nga mahibaloan kung asa ang First Aid station ug Police Assistance Hub sa matag duawon nga sementeryo.

Planohun pag-ayo ang pagdu-aw ilabi na panahon nga mogawas ug mobiya sa panimalay, nga nakaserado ang mga bintana ug pultahan.

Segurohon nga walay nakasaksak nga mga elekrikal nga gamit, abri nga gas stove ug gripo.
Likayan ang pagbilin og mensahe sa gawas sa balay nga nagsulting “walay tawo.” Aron malikay sa mga posibleng insidente.