Nahagsa ang duha ka sakyanan sa kahanginan sa US Navy sa South China Sea sa managlahing insidente niadtong Domingo, Oktubre 26, matod sa mga opisyal, ug walay gikataho nga namatay.
Ang unang pagkahagsa naglambigit sa usa ka MH-60R Sea Hawk helicopter, nga gikatahong “nahulog sa katubigan sa South China Sea samtang nagpahigayon og routine operations gikan sa aircraft carrier nga USS Nimitz,” sumala sa pahayag gikan sa Pacific Fleet sa US Navy.
Ang tanang tulo (3) ka tripulante sakay sa helicopter narekober sa search and rescue team, matod sa pahayag.
Samtang human sa tunga sa oras, sumala sa Navy, usa ka Boeing F/A-18F Super Hornet fighter jet ang nahagsa sa South China Sea, samtang nagpahigayon usab og regular nga operasyon gikan sa USS Nimitz.
Ang tanang personahe nga nalambigit luwas ug anaa sa stable condition, padayon sab nga ginaimbestigahan ang hinungdan sa duha ka insidente.
Nahitabo ang mga pagkahagsa samtang si US President Donald Trump anaa sa rehiyon, sa iyang unang pagbisita sa Asia sa iyang ikaduhang termino, ug samtang nag-andam si Defense Secretary Pete Hegseth nga magsugod usab og multi-country Asian tour.
Sa sayo pa niining tuiga, duha (2) ka US warplanes ang nahulog gikan sa Harry S. Truman aircraft carrier sa US Navy samtang nag-operate sa Middle East.
Photo courtesy: Fox 13 Seattle
