Gipasigarbo sa Russia ang kalampusan sa pagsulay sa ilang Burevestnik cruise missile nga gipadagan sa nukleyar, nga giingong usa sa labing advance nga armas sa kalibutan.
Gipasigarbo ni Russian President Vladimir Putin ang resulta sa maong missile test nga gihimo pipila ka adlaw human sa napakyas nga panagtagbo tali niya ug sa US President Donald Trump.
Tungod sa maong kalihokan, gipahamtangan sa Estados Unidos og mga silot ang dagkong kompanya sa lana sa Russia isip kabahin sa ilang disciplinary action sa gihimong mga kalihokan sa militar sa nasod.
Sumala ni Valery Gerasimov, punong heneral sa armadong pwersa sa Russia, ang Burevestnik missile nakalupad sulod sa 15 ka oras ngadto 14,000 ka kilometro. Gipasabot usab nga kini adunay kapasidad nga makalikay sa anti-missile ug anti-aircraft defenses.
Gitun-an karon sa administrasyon ni Putin ang pamaagi sa paggamit ug ang imprastraktura sa paglusad sa maong missile aron mapalapdan pa ang kapasidad sa depensa sa Russia.
Photo Courtesy to:Marca
