Gipasalig sa pagagamhanang probinsyal (PGB) ang padayong suporta alang sa mga programa ug kalihukan nga nagtumong sa kaayohan, rehabilitasyon, ug kabag-ohan sa mga Persons Deprived of Liberty (PDLs) sa Bukidnon Provincial Detention and Rehabilitation Center (PDRC).
Kini nga gipadayag ni Governor Rogelio Neil P. Roque atol sa culmination activity sa Araw ng Bilanggo 2025 nga gipahigayon nakalabayng adlaw sa Sitio Natid-asan, Casisang, Malaybalay City
Dugang pa gipahimangnuan ug gitambagan sa gobernador ang mga PDL’s nga kinahanglan hingpit silang magbag-o sulod sa prisuhan ug nipadayag ug usa ka sumbingay kabahin sa panultihon nga “kung unsa imong gitanom maoy imong anihon” busa mas maayong mohimog maayo sa komunidad.
Ang maong kalihukan kabahin sa tinuig nga National Correctional Consciousness Week (NACOCOW) Celebration, nga nagtinguha sa paghatag ug higayon sa mga PDLs nga makapartisipar sa mga aktibidad nga makapalambo sa ilang intellectual, psychological, social, physical, ug spiritual nga aspeto.
Karong tuiga nga tema “Matatag na Serbisyo, Patnubay sa Tunay na Pagbabago,” nagpakita sa malungtarong kalig-on ug pasalig sa correctional officers, personnel, ug partners nga nagpahinungod sa ilang trabaho dili lang sa pagmintinar sa disiplina, kondili sa paggiya usab sa mga tawo nga gihikawan sa kagawasan ngadto sa makahuluganong kausaban.
Ang kasaulogan naglangkob sa tulo ka adlaw nga kalihukan nga naglakip sa Santos nga Misa, PDL Zumba Contest, ug Awarding Ceremony
via: LGU Bukidnon
