Nagpahibalo ang Department of Migrant Workers (DMW) sa malampusong paglagda sa Joint Declaration of Intent (JDI) tali sa Pilipinas ug Slovenia nga adunay tumong sa pagpalig-on sa bilateral cooperation sa duha ka nasud ilabina sa labor mobility ug employment facilitation.
Sulod sa maong kasabutan, gihatagan og dakong pagtagad ang pagprotekta sa kahimtang ug katungod sa mga Overseas Filipino Workers (OFWs) nga magtrabaho sa Slovenia. Matod sa DMW, importante nga masiguro ang husto, patas, ug matarong nga pagtrato sa mga Pilipino didto.
Sa pagkakaron, nagpadayon ang koordinasyon ug mga preparasyon sa nagkalain-laing ahensya sa gobyerno alang sa padayon nga deployment sa mga Filipino workers ngadto sa Slovenia. Lakip sa ipadeploy ang mga trabahante sa hotel sector samtang adunay sab daghang Filipino professionals nga giandam alang sa posibleng oportunidad sa maong nasud.
Ang DMW misiguro nga magpabilin nga prayoridad sa gobyerno ang kaluwasan ug maayong kahimtang sa tanang Pinoy migrant workers.
PHOTO COURTESY TO: DMW
