Opisyal nang gibuksan kagahapong adlawa, Oktubre 24, ang 29th Siargao International Surfing Cup 2025 (WSL QS6000) sa Municipal Gymnasium sa lungsod sa General Luna, Surigao del Norte. Ang formal nga kompetisyon magsugod karong adlawa, Oktubre 25, hangtod sa Oktubre 31, sa sikat nga Cloud 9 break sa Barangay Catangnan.
Gibanabana nga 179 ka mga surfers gikan sa lain-laing nasud ang moapil sa prestihiyosong event. Lakip sa mga partisipante ang Japan, Korea, New Zealand, India, Australia, Brazil, France, Great Britain, Italy, United States, South Africa, Sweden, Taiwan, ug Pilipinas.
Pinakadaghan ang delegasyon sa Australia nga adunay 62 ka surfers, gisundan sa Japan (53), Pilipinas (33) ug India (15).
Si Philippine Sports Commission (PSC) Chairman Patrick Gregorio ang nagsilbing guest of honor, samtang si Andrew Stark, presidente sa World Surf League Asia Pacific, ang opisyal nga nagbukas sa seremonya. Init usab nga gi-welcome sa mga surfers ug bisita si Governor Robert Lyndon Barbers sa Surigao del Norte ug si Mayor Johnson Sajulga sa General Luna.
Sa iyang mensahe, mipasalig si Chairman Gregorio nga suportado sa national government ang maong event aron mapalambo pa kini isip leading sports tourism event sa nasud.
Ang Siargao International Surfing Cup, karon usa ka World Surf League Qualifying Series (QS6000) event, nagpadayon nga nagdala sa ngalan sa Pilipinas sa tibuok kalibutan sa surfing.
via: Siargao Island Property
