Gisugyot ang pagmugna og ad hoc committee nga mutuon ug morekomenda sa pagbutang og hiniusang sistema sa traffic lights ug security cameras atol sa regular nga sesyon ika-21 nga Konseho sa Siyudad niadtong nilabayng adlaw.
Giduso ni Council majority floor leader Edgar Cabanlas ang pagmugna sa ad hoc committee pinaagi sa paghangyo sa mayor nga magpagula og usa ka executive order (EO) alang niining katuyoan.
Kini nga sugyot nagsumikad sa usa ka special report ni Konsehal Maximo Rodriguez III mahitungod sa wala-nag-andar nga mga traffic lights ug closed-circuit TV (CCTV) cameras nga na-instalar sa pipila ka dapit sa Cagayan de Oro City. Inay makatabang kini nga mga traffic lights, nakapasamot na hinuon sa kahuot sa trapiko sa siyudad.
Sa bahin ni Konsehal George Christopher Goking—kinsa nagdumala sa komite sa pamatigayon ug komersyo sa konseho—nga nagtuon na sila og mga paagi aron amendahan ang ordinansa sa siyudad bahin sa mga CCTV aron maapil ang pagkuha sa pribado nga mga security cameras sa mga commercial establishment panahon sa imbestigasyon sa pulis.
Photo courtesy: Cagayan de Oro City Council
