Gihatagan og score nga 7 out of 10 sa Environmental Management Bureau (EMB ) Region X ang gihimong mga lakang sa syudad aron nga sulbaron ang problema sa pagpangolekta sa basura, lakip na pag-atiman sa Pagalungan Sanitary Landfill, subay na usab sa una nang gipagula nga show cause order sa buhatan.
Human sa gihimong inspeksyon sa landfill kagahapong adlawa, nakita ni EMB X Regional Director Reynaldo Digamo nga aduna nay kausaban ang kahimtang sa landfill kung asa hinay-hinay ng napatag ang gabundok nga basura sa cell 2 nga bahin sa landfill. Nahakot na sab ang mga basura nga gitapundog sa parte sa landfill nga walay liner.
Samtang gipaningkamutan usab nga dili muapaw ang leachate pond o imbakan sa mga duga sa basura gikan sa landfill tungod delikado kini nga mopaingon sa mga water ways sa syudad. Lakip nga gisusi ni RD Digamo ang waste water treatment facility sa landfill.
Tuod adunay nakitang progreso si RD Digamo apan daghan pa gihapong atimanon ang syudad aron nga mamintina na ang kahimtang sa landfill nga ning kasamtangan padayon pang gina-rehabilitate sa CLENRO ug City Engineers Office. Nasulbad na usab ang daot nga dalan og pwede nang maagian sa mga garbage truck.
Kahinumduman nga giisyuhan sa EMB X og show cause order ang syudad tungod sa mga violation o kakulangan sa kompanyang tigdumala sa Pagalungan Sanitary Landfill lakip na ceast and desist order kun stoppage order sa transfer station sa Barangay Pagatpat tungod sa kakulang sa mga rekisitos.
