Gisusi personal ni Department of Public Works and Highways (DPWH) Secretary Vince Dizon ang nahugmak nga national highway (Bukidnon-Davao Route) gumikan sa landslide sa Purok 6, Zigzag, Barangay Palacapao, Quezon, Bukidnon kagahapon Oktobre 21, 2025.
Paningkamotan matod pa sa opisyal nga madownload na sa DPWH Region 10 Office sa daling panahon ang kinahanglanon nga pondo alang sa pagahimuon nga Detour sa Palacapao Zigzag Road lungsod.
Si Quezon Municipal Pubic Information Officer Ford Cabarde miingon sa exclusive nga pakighinabi sa Juander Radyo Malaybalay nga kini maoy gibutyag ni Secretary Dizon atol sa iyang pagbisita sa disaster site alas 3:00 sa hapon sa iyang pakigpulong sa mga opisyales sa LGU Quezon, MDRRMO, ug sa provincial government alang sa lakang nga himoon aron pagpasiguro sa kaluwasan ug pagpasig-uli sa Bukidnon–Davao road.
Inubanan ni Governor Rogelio Neil P. Roque ug Mayor Poling Lorenzo III nakita ni Dizon ang sitwasyon sa lugar ug gisaad nga sa mas daling panahon mapangitaan ug pamaagi nga maagian na ang dalan aron dili kaayo magrabehan ang lungsod sa epekto sa pagkunhod sa ekonomiya.
Dako usab ang pagsalig ug pagtuo ni Governor Roque nga sa daling masolusyonan sa DPWH ang maong problema sa dalan nga adunay dakong kontribusyon sa estado ug kalambuan sa probinsya.
via: Oniel Roque/LGU Quezon
