Mipahibalo si Presidente Lai Ching-te sa usa ka bag-ong inisyatibo nga naglakip sa pagtukod sa usa ka multi-layered air defense system nga gitawag og “T-Dome”, nga gimugna aron mapalig-on ang proteksyon sa Taiwan batok sa mga hulga sa kahanginan.
Ang proyekto gilaraw nga mahimong mas episyente sa pagtubag sa mga air strikes pinaagi sa mas paspas nga komunikasyon gikan sa sensor ngadto sa mga pwersang militar. Sumala sa mga opisyal sa depensa, ang T-Dome system maghiusa sa tanang air defense units sa nasud pinaagi sa usa ka centralized network.
Kini magahatag og mas paspas nga pagtino sa lokasyon sa mga hulga sama sa missile o eroplano ug magpadali sa pagpalihok sa mga depensa ug kini nga pamaagi gilauman nga makapahapsay sa operasyon ug mopataas sa “kill rate” o pagkamaayo sa pagdepensa.
Dugang pa niini, lakip sa plano ang pagtaas sa defense budget nga posibleng moabot sa 5% sa GDP sa umaabot nga mga tuig aron masiguro nga adunay igong pondo alang sa modernisasyon sa armas, radar systems, ug training sa mga sundalo.
Gilauman usab nga kini magpahugot sa kahimtang sa seguridad sa nasod, tali sa nagpadayon nga tensyon sa rehiyon. Gipangandaman na sa gobyerno ang full implementation sa T-Dome system, sa mosunod nga tuig, ug gilauman nga kini makahatag og mas lig-on nga panalipod sa mga lungsod ug base sa militar.
Gidasig usab sa presidente ang kooperasyon sa publiko ug mga alyado nga nasud aron mapalig-on pa ang depensa sa Taiwan.
Photo courtesy to:Arise News
